ევროკავშირი და ბრიტანეთი რუსეთის წარმომადგენლის გამოსვლას „დიდი ოცეულის“ სამიტზე ბოიკოტს გამოუცხადებენ

ევროკავშირი და ბრიტანეთი აპირებენ ბოიკოტი გამოუცხადონ რუსეთის დელეგაციის გამოსვლას „დიდი ოცეულის“ (G20) სამიტზე, რომელიც ინდონეზიაში, ბალიზე გაიმართება 15-16 ნოემბერს. ამის შესახებ იტყობინება ბრიტანეთის Daily Telegraph-ი. ევროკავშირის საგარეო ურთიერთობათა სამსახურმა აცნობა გაზეთს, რომ საერთაშორისო თანამეგობრობას ამგვარად სურს აჩვენოს, რომ ფიქრობს "რუსეთის მიერ ჩადენილ დანაშაულებზე, ბოროტმოქმედებასა და უკანონო ქმედებებზე“. ბლოკი რუსეთს მოუწოდებს ასევე, შეწყვიტოს ომი და აღნიშნავს, რომ მოლაპარაკება უნდა წარიმართოს უკრაინისთვის მისაღები პირობებით. ადრე გავრცელდა ცნობა, რომ რუსეთის პრეზიდენტი ვლადიმირ პუტინი, არ აპირებს ბალიზე წასვლას და არც ონლაინ მონაწილეობას, და რომ G20-ის სამიტზე კრემლს საგარეო საქმეთა მინისტრი, სერგეი ლავროვი წარმოადგენს. „დიდი ოცეულის“ სხვადასხვა ლონის შეხვედრებზე რუსეთის წარმომადგენლები არაერთხელ მოექცნენ იზოლაციაში. 3 ნოემბერს უკრაინის პრეზიდენტმა, ვოლოდიმირ ზელენსკიმ განაცხადა, რომ უარს იტყვის სამიტში მონაწილეობაზე, თუ მასში პუტინი ჩაერთვება. კიევმა 8 ნოემბერს დაადასტურა, რომ ზელენსკი სამიტში „რომელიმე ფორმატში“ -ალბათ ონლაინ, მონაწილეობას მიიღებს. ...